A “Fondazione Genoa 1893 ETS” a nasce inti meixi de marso 2006 con l’obitettivo de promeuve o crescio da communitæ de sostegnitoî da squaddra e l’identificaçion inti valoî da seu tradiçion sportiva e sòccio-colturale.

Se tratta de unna “Fondaçion de parteçipaçion”, chi aderisce o peu esprimme o seu voto pe-a nòmina di membri do Consegio de Indirisso, e a l’à tra e seu finalitæ primmäie a promoçion de iniçiative e strumenti educativi in sciô tema do sport, mascime do zeugo do ballon comme spettacolo, comme pratica e comme momento de aggregaçion sociale e de promoçion da condiçion giovanile segondo i valoî de lealtæ, sportivitæ e civiltæ.

Da-o 2008, co-a realizzaçion do Museo da Stöia do Zena, a Fondaçion a l’amplia a seu attivitæ, in dedicâ tutte e energie e l’impegno a-e attivitæ che contribuiscian à avvardâ e conservâ a stöia do “Genoa Cricket and Footbal Club”. O riordino archivistico in corso, a conservaçion e a digitalizzaçion, l’invetariaçion di documenti son e tappe che no se peuan sghindâ de un percorso teiso à affavoî unna riçerca efficace de informaçioin stòriche, da parte de un pubrico o ciù esteiso poscibile.

A stöia do “Genoa Cricket and Footbal Club” a l’è, à conti fæti, un universo de memöia che, à traverso fotografie, documenti, pellicole e testimonianse dirette, a no â cianta mai de contâ a seu stöia e a stöia do zeugo do ballon. I papê, i oggetti, i pòsti “parlan”, se savemmo dâghe a mente.

A recuggeita di documenti stòrichi, finalizzâ a-a valorizzaçion da memöia e do patrimònio stòrico e colturale do “Genoa Cricket and Footbal Club”, a l’è pensâ pe-i studdioxi, pe-o mondo da scheua, ma ascì pe un pubrico ciù vasto de appasscionæ do zeugo do ballon. Con l’intendimento de promeuve a conoscensa e a condivixon, o Museo da Stöia do Zena o rivòlze particolari attençioin a-a didattica, con unn’offerta articolâ de vixite guiddæ, conferense e laboratöi.

Un disegno de grande respio, à traverso o quæ a “Fondazione Genoa 1893 ETS” a se propoñe de fâ conosce a seu stöia, con dedicâ parte de seu risorse a-a promoçion de studdi, mostre e conferense in campo stòrico e colturale. Unna stöia importante da trasmette into tempo, mantegnindo a continuitæ naturale ch’a liga a stöia do “Genoa Cricket and Footbal Club” a-a coltua e a-o territöio, investindo in riçerca e innovaçion.



Inscrivite a-a Newsletter


    Restemmo in contatto: